Տեղեկություններ էլեկտրամագնիսական դաշտերի մասին

            Ժամանակակից մեքենաշինական գործարաններում լայն կիրառում են գտել բարձր հաճախականությամբ հոսանքները: Դրանք օգտագործվում են ինդուակտիվ և դիէլեկտրիկ եղանակներով ջերմային մշակման ենթարկվող նյութերը տաքացնելու, մետաղները հալելու, հետազոտական կամ այլ նպատակներուվ բարձր ջերմաստիճաններ ստանալու համար:

            Տաքացման այս եղանակների կիրառումը հնարավորություն է տալիս բարձրացնելու աշխատանքի արտադրողականությունը, արտադրանքի որակը և արտադրության շահավետությունը:

            Ռադիո-հեռուստատեսային սարքավորումներ արտադրող և օգտագործող գործարաններում, մասնավորապես այդ սարքավորումների փորձարկման ու կարգավորման բաժիններում, ինչպես նաև ռադիոսպեկտրոսկոպիկ ստուգումների ու արտադրության կառավարման պրոցեսներում, մեծ չափերի է հասնում ուլտրաբարձր հաճախականությամբ հոսանքների կիրառումը:

            Անհամասեռ միջավայրում էլեկտրամագնիսական ալիքները կարող են բեկվել, կլանվել, ենթարկվել դիֆրակցիայի և ալիքային երևույթներին հատուկ այլ փոփոխությունների:

            Էլեկտրամագնիսական դաշտի էներգիան, ալիքների ցանկացած երկարության դեպքում, սանիտարահիգիենիկ տեսակետից ընդունված է գնահատել ճառագայթման ինտենսիվությամբ, այսինքն` էներգիայի հոսքի չափով, որը միավոր ժամանակամիջոցում ընկնում է հոսքին ուղղահայաց միավոր մակերեսի վիա:

            Գերբարձր հաճախականությունների միջակայքում ինտենսիվությունը գնահատվում է էներգիայի հոսքի խտությամբ, արտահայտված մՎտ/ սմ² կամ մկՎտ/ սմ² մեծություններով:

            Աշխատանքային պայմանները ուսումնասիրելու և բարելավելու նպատակով, աշխատատեղերում ճառագայթման ինտենսիվությունը չափվում է հատուկ սարքերով: 50 Հց-ից մինչև 100 կՀց հաճախականությամբ էլեկտրական և մագնիսական դաշտերի լարվածություններիը չափելու համար մեծ կիրառում է գտել Լենինգրադի աշխատանքի պաշտպանության ինստիտուտի մշակած ИЭМП – 2 սարքը, իսկ 100 կՀց-ից մինչև 1,5 ՄՀց հաճախականությունների համար այդ նույն ինստիտուտի նախագծած ИЭМП սարքը: